Министрлер кабинетинин тиешелүү чечими кабыл алынганга чейин Кыргызстандан накталай чет өлкөлүк валютаны алып чыгууга убактылуу тыюу салынды. Тийиштүү чечимге Министрлер кабинетинин төрагасы Акылбек Жапаров кол койгон.
Аталган чечим финансы-экономикалык коопсуздукту камсыз кылуу, ички валюта рыногундагы кырдаалды турукташтыруу, ошондой эле Кыргызстандын улуттук кызыкчылыктарын коргоо максатында кабыл алынган.
Чечимге ылайык, төмөнкүдөй убактылуу тыюу салуу белгиленген:
– резидент эместерге жана чет өлкөлүк жарандарга 5000ден (беш миң) көп накталай АКШ доллары суммасында;
– Кыргызстандын жарандарына жана резиденттерине 10 000ден (он миң) көп накталай АКШ доллары суммасында;
Кыргызстандын жарандары жана резиденттери 10 000ден (он миң) көп АКШ доллары суммасында накталай АКШ долларын алып чыккан учурда, белгиленген лимиттен ашкан сумманын 10 % өлчөмүндө төлөм алынат.
Улуттук коопсуздук мамлекеттик комитетинин Чек ара кызматына жана Мамлекеттик бажы кызматына накталай АКШ долларын алып чыгууга бөгөт коюуга багытталган зарыл чараларды көрүүсү тапшырылды.
