Президент Садыр Жапаровдун колдоосу менен эл аралык маанидеги Ош – Баткен – Раззаков унаа жолуна (Ноокат) асфальт төшөө иштери аяктады. Бул тууралуу Транспорт жана коммуникациялар министрлигинен билдиришти.
Маалыматка ылайык, алдыда жол сызыктары чийилип, 1-сентябрга чейин жол белгилери орнотулуп, жумуштар толук жыйынтыкталат.
Белгилүү болгондой, Ноокат жолун калыбына келтирүү иштери 2023-жылдын март айында башталган.
«Бул жол өлкө жетекчилигинин тапшырмасы менен казынадан каралган каражатка «Кыргызавтожол» мамлекеттик ишканасы тарабынан оңдолуп, жумуштар эки тилкеде (Ош — Баткен — Раззаков унаа жолунун 27+960 – 34+400 жана 40+350 – 46+910 чакырым аралыгында) жүргөн. Жер иштеринен тарта асфальт төшөөгө чейинки жумуштар президенттин жеке көзөмөлүндө туруп, учурда эки тилкеде тең иштер аяктады», — деп айтылат маалыматта.
Жаңы келген 265 техниканын бир бөлүгү биринчи кезекте Ош – Баткен – Раззаков унаа жолуна жеткирилип, иш ыргагын кыйла ыкчамдатты.
Эскерте кетсек, Ош – Баткен – Раззаков унаа жолунун 0-75-чакырым аралыгы Ош облусунун аймагында жайгашкан. Анын ичинен 0-6-чакырымы Ош шаары, 6-11- чакырымы Кара-Суу району, 11-75-чакырымы Ноокат району (38-41-чакырымы Ноокат шаары) аркылуу өтөт.
