Казакстандын Россия, Кыргызстан жана Өзбекстан менен чектешкен жеринде адамдардын жана транспорт каражаттарынын узун кезеги жаралды.
Казакстандын Улуттук коопсуздук комитети мындай көрүнүштүн себебин түшүндүрдү.
Тактап айтканда, казак-орус чек арасындагы «Кайрак»–«Бугристое» жана «Сырым»–«Маштаково» көзөмөл-өткөрүү пункттарында, казак-кыргыз чек арасындагы «Карасу»–«Ак-Тилек» көзөмөл-өткөрүү пунктунда, казак-өзбек чек арасындагы «Жибек жолы»–«Гишт-Куприк», «Казыгурт»–«Ташкент», «Атамекен»–«Гулистан» көзөмөл-өткөрүү пункттарында адамдар жана транспорт каражаттары көп болууда.
Казакстандын Улуттук коопсуздук комитети мындай кырдаалга көзөмөл-өткөрүү пункттарындагы оңдоп-түзөө иштери, мөмө-жемиш бышкан убакка байланыштуу жүк ташуу көбөйгөнү жана туристтердин саны да арбыганы себеп болуп жатканын билдирди.
