Кыргызстанда «Бала ырысы» айлык жөлөкпулу ишке киргизилгенден бери үч жашка чейинки балдарга төлөм алуу үчүн 240 миңден ашык арыз кабыл алынды. Бул тууралуу Эмгек министрлиги билдирди.
Программа ишке ашкан биринчи июль айында 191 миң 796 арыз кабыл алынган. Ошентип, кайрылуулардын саны дээрлик 52 миңге же 26,6 пайызга көбөйгөн.
Программанын негизги көрсөткүчтөрүнүн бири «Түндүк» мобилдик тиркемесинин жигердүү колдонулушу болду. Арыздардын 83 пайызы электрондук форматта, ал эми 17 пайызы аймактык бөлүнүштөр аркылуу түшкөн.
Төлөмдүн өлчөмү ар бир бала үчүн туулгандан баштап үч жашка чейин ай сайын 1,2 миң сомду түзөт. Бийик тоолуу жана алыскы аймактарда жашаган балдар үчүн жөлөкпулдун өлчөмү белгиленген райондук коэффициенттерди эске алуу менен аныкталат.
Учурда система маалыматтарды пландалган жаңыртууну жана актуалдаштырууну, ошондой эле түшкөн арыздарды этап-этабы менен иштеп чыгууну ишке ашырууда. Мындан тышкары, эсептөөлөрдүн жана төлөмдөрдү чектөөнүн тууралыгын камсыз кылуу үчүн зарыл болгон маалыматтарды салыштыруу жүргүзүлүүдө.
Бул процедуралар көп сандагы кайрылууларды иштеп чыгуунун белгиленген процессинин бир бөлүгү болуп саналат жана төлөмдөр туура эсептелип, чегөрүлүшүнө багытталган. Жооптуу мамлекеттик органдар жана техникалык адистер аныкталган дал келбестиктерди жоюу жана системанын ишинин туруктуулугун жогорулатуу боюнча биргелешкен ишти улантууда.
Иштеп чыгуу аяктагандан кийин төлөмдөр белгиленген тартипте 10-11-сентябрга чейин жүргүзүлөт.
