Фактчек: Кыргызcтан «Байрактарды» колдонгону тууралуу маалымат жалган 

Социалдык тармактарда кыргыздар «Байрактар» сокку уруучу учкучсуз учактарын тажиктерге карата колдонуп атканы тууралуу видео тарады. Тасмада унаалардын артында жардыруу болгонун көрсө болот.  

Кумар Кубатов аттуу колдонуучунун посту Facebook социалдык тармагында 236 жолу бөлүшүлгөн.

Bulak.kg бул маалыматты текшерип көрдү. 

Видео n_rajabov аттуу TikTok колдонуучусуна таандык экенин көрүүгө болот. Анын аккаунтагы тасманы дагы колдонуучулар бүгүнкү чек ара жаңжалына байланыштырып, кызуу талкууга алган.

Ал эми TikTok социалдык тармагы видео 9-сентябрда тартылганынан кабар берет. 

Издөө системаларынын жардамы менен дал ушул күнү Душанбе-Чанак трассасынын 46-чакырымында газ ташыган унаанын тормозу иштебей калгандыктан, автокырсыкка кабылып, жыйынтыгында жарылып кеткени белгилүү болду

Бул кырсыктан улам 3 адам каза болуп, 4 адам ооруканага жеткирилген.

Эки тасмада тең аба ырайы бирдей жана адамдардын жеңил кийингени түспөлдөш экенин байкаса болот. 

Жыйынтык: фейк. «Байрактар» сокку уруучу учкучсуз учактарын тажиктерге карата колдонулуп аткандыгы тууралуу маалымат чындыкка дал келбейт.