Чек арадагы кырдаалды туруктуу кармоо максатында Кыргызстандын Баткен районунун акими Учкунбек Жоробаев менен Тажикстандын Исфара районунун төрагасы Баховадин Баходирзадо жолукту.
Жолугушууда эки тараптын милиция кызматкерлери буга чейинки окуяларды биргелешип иликтөө, чагымчылдык аракеттерди алдын алуу үчүн чараларды көрүү боюнча макулдашканы кабарланды.
“Албетте, чек арада жакын күндөрү болуп кеткен окуяларды талкуулап, жолдо бараткан автоунааларга таш аткандарды биргелешип иликтөөнү макулдаштык. Айрыкча, майрамдын алдында кандайдыр бир абалды курчутуу үчүн терс көрүнүштөр болуп кетпесин деп, алдын алуу тууралуу сүйлөштүк. Ал үчүн эки райондун милиция кызматкерлери чогуу аракеттене турган болду”,- деди Жоробаев.
25-декабрда Лейлек районунун Сай аймагынын тушунда Тажикстандын чек арачылары өз бекетинин аймагына миномет жайгаштырганы кабарланган. Ошол эле күнү кечинде Ош-Баткен-Исфана автожолунун Көк-Таш айылынын Эки-Таш аймагында Тажикстандын 3-4 жараны кыргызстандык автоунааларга таш ыргытканы айтылды. Андан автоунаалар жабыркап, эч ким жаракат алган эмес. Окуя болгон жерге барган «Көк-Таш» чек ара бекетинин башчысы эскертүү иретинде үч жолу асманга ок чыгарган. Андан соң тажик жарандары качып кеткен. Ушундан кийин аймакта чек ара кызматкерлери күчөтүлгөн тартипте кызмат өтөп жатышканы айтылган эле.
Кыргызстан менен Тажикстандын чек арасынын узундугу 970 чакырымдай болсо, анын 519 чакырымы гана такталган. Чек аранын такталбаганы жер, суу, жайыт талаштан чыккан чатактарга себеп болот. Апрелдин соңундагы жаңжал бүтүндөй регионду сестентти. Куралдуу жаңжалда ондогон адамдын өмүрү кыйылган.
