Нарын облусунда уюшкан кылмыштуу топтун мүчөлөрү кармалганын
УКМКдан билдиришти.
7-ноябрда уюшкан кылмыштуу топтун мүчөлөрү Ш.Н.О., А.Ы.А., Б.Ө.Н. жана О.Ч.О. Кочкор
районундагы кафеге барып, анын ээсин коркутушкан. Башкача айтканда, аларга ай
сайын 1 миң доллар берип турууну талап кылып, болбосо, кафени өрттөп салышарын
айтышкан. Кафенин ээси (аял киши) милиция кызматкерлерин чакырган.
Кафеге Кочкор РИИБдин нөөмөт кызматынан барышкан, бирок уюшкан кылмыштуу
топтун мүчөлөрү аларды көзгө илбей, кафенин ээсин коркута беришкен. Шектүүлөр
ишкер айымга зордуктап коюшарын да айтышкан.
Милиция кызматкерлери жардам берүүнүн ордуна кетип калышкан. Ал эми рэкеттер 2
саат бою ишкер айымды мазакташкан. Алар уюшкан кылмыштуу топтун лидери, күч
жана бийлик өкүлдөрү менен байланышта экенин белгилешкен.
Ишкер айым кайрадан милиция кызматкерлерин чакырууга мажбур болгон. Ал учурда
башка милиционерлер: капитан А.А.М., М.у.А., тергөөчү К.А.А. жана сержанттар курамы
барышкан. Алар «рэкеттерди» тынчтандырууга аракет кылышкан, бирок бейбаштар
талапка баш ийген эмес. Андан тышкары, рэкеттер милициянын айылдык бөлүмүнүн
жетекчиси — капитан А.А.М.ны көчөгө алып чыгып, кесиптештеринин көзүнчө сабап,
андан соң качып кетишкен.
Бул факт Уюшкан кылмыштуу топтуу түзүү же ага кошулуу беренеси менен катталган
Тергөөнүн жүрүшүндө Кочкор РИИБдин жетекчилиги рэкеттерди калкалап келишкени
аныкталды. Ошондой эле, бул окуяны жашырууга аракет болгон. Тактап айтканда,
нөөмөт кызматына окуяны каттабоого буйрук берилген.
«РИИБдин жетекчилиги кызмат абалын пайдаланып, кафенин ээсин тиешелүү
органдарга арыз менен кайрылбоого көндүрүүгө аракеттенишкен», – дейт УКМК.
Учурда рэкеттердин башка кылмыштарга тиешеси бар-жогу иликтенип жатат. Ал эми
Кочкор РИИБдин жетекчилеринин кызмат абалын пайдалануу, шалаакылык, кылмышты
жашыруу аракеттерине юридикалык баа берилет
