УКМК «Бүтүн Кыргызстан» фракциясынын депутаттарына Сүлүктүдөгү пост боюнча видеого жооп берди

0
162

УКМК Жогорку Кеңештин «Бүтүн Кыргызстан» фракциясынын депутаттары Сүлүктү шаарындагы «Кольцо» транспорттук көзөмөл постуна барганы тууралуу социалдык тармактарга жарыяланган видео боюнча комментарий берди.

УКМК билдиргендей, “Бүтүн Кыргызстан” фракциясынын депутаттарына айрым жарандар чек ара посторундагы жагдайлар боюнча туура эмес маалымат берген.

Аткезчиликке жана товарларды мыйзамсыз ташууга каршы күрөшүүнүн алкагында аталган постто Улуттук коопсуздук мамлекеттик комитетинин, Чек ара кызматынын, Ички иштер министрлигинин жана Финансы министрлигине караштуу Мамлекеттик бажы кызматынын кызматкерлеринен турган компетенттүү органдардын өкүлдөрү кызмат өтөйт. Постко барган учурда айдоочулардан бул пост аркылуу өткөнү үчүн акча талап кылынат деген нааразычылыктар жана бул пост мыйзамсыз иштеп жатат деген арыздар түшкөн.

УКМК бул пост КР Президентинин Баткен облусундагы ыйгарым укуктуу өкүлүнүн токтомуна ылайык коюлганын, мындай посттор Баткен районунун башка жолдорунда да бар экенин билдирет.

Эгерде посттун кызматкерлеринен пайда көрүү максатында акча талап кылынса, анда жарандар УКМКнын Лейлек райондук бөлүмүнө же Баткен облустук башкармалыгына, андан тышкары, прокуратура органдарына тиешелүү арыз менен кайрылса болот эле, бирок андай кайрылуулар түшкөн эмес. Посттун кызматкерлери кызматтык күбөлүгү жок иштейт деген божомолдор да далилденген эмес.

Андан соң Кулунду айылынын маданият үйүндө Баткен районунун акими, Баткен районунун күч түзүмдөрүнүн жетекчилиги жана Жогорку Кеңештеги «Бүтүн Кыргызстан» фракциясынын депутаттарынын Лейлек районунун ылдыйкы зонасындагы эл менен, 250дөн ашык адам  менен жолугушуусу болуп бул маселе кайрадан каралып чыкты.

Бирок бул жыйында да Жогорку Кеңештеги “Бүтүн Кыргызстан” фракциясынын депутаттары жана жергиликтүү тургундар эч кандай далилдүү фактыларды келтире алышкан жок.

Видеодогу аталган посттун кызматкерлерине нааразычылыгын билдирген жаран-бул КР 1982-жылы туулган Т.А. аттуу Кыргыз Республикасынын мыйзамын одоно бузган жарандардын бири экенин ведомство белгилейт.

Бул жаран Тажикстанга биздин продукцияларды активдүү сатуучу, анын натыйжасында ушундай адамдардын айынан ички рынокто азык-түлүктүн баасы көтөрүлүп жатканы тууралуу Атайын кызматта маалымат бар.

УКМК кызматкери  Жогорку Кеңешинин депутаты А.Мадумаровго өзүн тааныштырбаган учурда ал кызматкер оперативдүү деңгээлдеги кызматкер экендигин, андан тышкары А.Мадумаров анын түздөн-түз жетекчиси эмес экенин түшүндүрөбүз.

Атайын кызмат УКМКнын кызматкерлери кызматтык милдеттерин аткаруу учурунда болгондуктан, эч жакка качпастан, жөн гана физикалык маалыматтарын ачыкка чыгарбоо максатында четтеп кетишкенин баса белгилейт.

УКМК Кыргызстандын жарандарын мындай билдирүүлөр менен коомчулукту дүрбөлөңгө салбоого чакырат. Атайын кызмат мындай кайрылуулар жана арыздар колдонуудагы мыйзамдарга ылайык кылмыш жоопкерчилигине тартыларын эскертет.

ОЙ ПИКИР КАЛТЫРУУ

Please enter your comment!
Please enter your name here
This site is protected by reCAPTCHA and the Google Privacy Policy and Terms of Service apply.