Белгилүү журналисти Нарынбек Идинов (Нарын Айып) Бишкектеги «Жетинчи канал» телеканалынын имаратында каза болду. Маалыматты 24.kg журналистине телеканалдын башкы директору Илязбек Балташев тастыктады.
Анын айтымында, Нарын Айып бүгүн, 13-февралда жумушка келип, өзүн жаман сезгендигин айткан эмес.
«Саат 14:00дөр чамасында кесиптештери аны иш бөлмөсүндөгү диванда жаткан жеринен табышкан. Кыязы, ал өзүн жаман сезип жаткан. Диванга жатар алдында бут кийимин чечкен. Биз камераларды карап көрдүк . Ал студиядагы иш процесстерин карап, диванга отуруп, кабинетине жөнөдү», — деди Илязбек Балташев.
Дароо дарыгерлерди чакырылып, алар сөөктү өлүкканага алып кетишкен.
Нарынбек Идинов 1952-жылы Нарын облусунун Жумгал районунда туулган. 1974-жылы Кыргыз улуттук университетинин физика факультетин бүтүргөн. 1975-1976 —жылы Ломоносов атындагы Москва мамлекеттик университетинин физика факультетинде аяктаган. СССР Илимдер академиясынын Нефть-химиялык синтез институтунун аспирантурасын бүткөн.
Ал өлкөдөгү ар кандай маалымат каражаттарында — «Азаттык», КТРК, НТС, «Бешинчи канал», «Заноза» телеканалдарында иштеп, гезиттерди чыгарып, аналитикалык берүүлөрдү алып барган.
Нарын Айыптын артында жубайы жана төрт кызы калды.