Бакай-Ата районунда 24-июнда саат 16:00дөр чамасында мөндүр аралаш жамгыр жааган. Бул тууралуу Өзгөчө кырдаалдар министрлигинен билдиришти.
Маалыматка ылайык, табигый кубулуштун кесепетинен Күмүштак айыл аймагынын Кыргызстан, Жон-Коргон жана 1-Май айылдарында болжол менен 50 гектар эгин талааларына зыян келтирилген.
Ошондой эле Боо-Терек айылында каттуу шамалдан болжол менен 15 турак үйдүн чатырын учуруп кеткендиги тууралуу маалымат түшкөн.
Мындан улам Бакай-Ата райондук өзгөчө кырдаалдар бөлүмүнүн куткаруучулары жана район акими абалды жеринде көрүштү.
Белгиленгендей, бүгүн Жарандык коргонуу комиссиясы материалдык чыгымдарды тактоо иштерин жүргүзөт.