Ош облусунун Кара-Суу райондук ички иштер башкармалыгында «Ата Журт Кыргызстан» партиясы шайлоочуларды сатып алууда делген маалымат боюнча милиция кызматкерлери текшерүү иштерин жүргүзүүдө.
Бул тууралуу облустук ички иштер башкармалыгынан билдиришти.
Маалым болгондой, милицияга арыз менен 29 жаштагы М.Б. кайрылган. Ал 24-ноябрь күнү саат 23:00дөр чамасында Кара-Суу районунун Шарк айылындагы үйлөрдүн бирине «Тойота Камри» үлгүсүндөгү унаа келип түшкөнүн билдирген. Унаадан бир жигит түшүп, «Ата Журт Кыргызстан» партиясынын штабы жайгашкан үйгө кирген. Арыз ээси айдоочунун артынан штабка киргендигин билдирген. Анда айдоочу штабда отурган бир аялга барак берген. Ошол маалда арыз ээси жана анын достору ал кишини кармоого аракет кылышкан, бирок ал сумкасын үйдүн короосуна ыргытып качып кеткен. Баштыкта акча болгон жана ал арыз ээси чакырган милиция кызматкерлерине берилген.
Арыз ээси айдоочу «шайлоочуларды сатып алган» агитатор экенин белгиледи.
Ал эми айдоочу А.Т.нын айтымында, 24-ноябрь күнү ал Шарк айылындагы досуна барган – ал өзү машине саткандыктан арзан баада жакшы унаа карап берүүнү суранган.
«Үйгө киргенде бир нече адам чуркап келип: «Аны кармагыла» деп кыйкырышты. Мен коркуп кетип, тоноп кеткиси келип жатат деп ойлоп, 259 миң сом салынган сумкамды ыргытып жибердим», – деп билдирген А.Т.
Иликтөө иштеринин жүрүшүндө “Ата Журт Кыргызстан” саясий партиясынын штабы А.Т. келген аялдын үйүндө жайгашканы белгилүү болду.
Арыз ээси Кара-Суу районунун тургуну, ошол күнү ал жерде «Альянс» партиясында иштеген достору менен болгон. Материалдар катталып, КР Кылмыш-жаза кодексинин 192-беренеси “Шайлоочуларды сатып алуу” боюнча сотко чейинки өндүрүш иштери башталган.