Өзбекстандын футбол боюнча улуттук курама командасы 2026-жылдагы дүйнө чемпионатында экинчи беттешин өткөрдү. Топтук этаптын экинчи турунун алкагында Фабио Каннаваронун командасы Португалия курамасы менен кездешип, 5:0 эсебинде жеңилип калды..
Беттештеги эсеп алгачкы эле 6-мүнөттө ачылды. Португалия курамасынын капитаны Криштиану Роналду так соккусу менен айырмаланып, өз командасын алдыга чыгарды.
17-мүнөттө португалиялыктардын артыкчылыгын Нуну Мендеш арттырды. Португалиянын коргоочусу айып соккусун ийгиликтүү аткарып, эсепти 2:0гө чыгарды.
29-мүнөттө Өзбекстан курамасы атаандашынын дарбазасына топ киргизүүгө жетишкен. Азизжон Ганиев топту тосуп алгандан кийин дарбазанын жогорку бурчуна так сокку узаткан, бирок VAR системасын көргөндөн кийин калыс чабуулдун өнүгүшүндө эреже бузууну каттап, голду жокко чыгарды.
Тыныгууга чейин Португалия үчүнчү топту киргизди. 39-мүнөттө Криштиану Роналду дубль жасап, өз командасынын артыкчылыгын дагы жогорулатты.
Беттештин акыркы эсеби оюндун соңунда аныкталды. 60-мүнөттө португалиялык кураманын чабуулунан кийин Абдукодир Хусанов топту өз дарбазасына киргизип алса (автогол), ал эми 87-мүнөттө оюнга алмашуу менен кирген Рафаэл Леау Өзбекстандын дарбазасына бешинчи топту багыттап, акыркы эсепти — 5:0 кылды.
Эки турдан кийин Өзбекстан курамасы К тайпасында төртүнчү орунда калууда. Топтук этаптын жыйынтыктоочу беттешинде Фабио Каннаваронун командасы Конго Демократиялык Республикасынын (КДР) курамасына каршы ойнойт. Беттеш 28-июнда өтөт.
