Бишкек-Ош автожолундагы жол кырсыгынан төрт адам мүрт кетип, дагы алты киши жаракат алды. Бул тууралуу Чүй облусунун Жол кыймылынын коопсуздугун камсыздоо башкармалыгы билдирди.
Расмий маалыматка ылайык, кырсык 30-майда болгон. Бишкек-Ош жолунун 178-чакырымында (ред: Суусамыр) түштүктөн түндүктү көздөй бараткан Honda Civic үлгүсүндөгү машиненин 30 жаштагы айдоочусу уктап кетип, каршы тилкеде келаткан Kia К7 автоунаанасы менен кагышкан.
Кырсыктан 3, 11, 13 жаштагы балдар жана 22 жаштагы дагы бир адам каза болгон. Каза тапкандар бир үй-бүлөнүн мүчөлөрү экени айтылууда.
