Талас облусундагы күрөш залдарына “Альянс Алтын” компаниясы Улуттук Олимпиада комитети менен биргеликте күрөш килемдерин (мат) тапшырып берди. Бул тууралуу компаниянын коомчулук менен байланыш бөлумүнүн башчысы Сарчаев Кынатбек билдирди. “Альянс Алтын” компаниясы КРнын Улуттук Олимпиада комитети менен келишим түзгөн.
Ал келишимдин негизинде Талас облусундагы спорттук иш чараларга, спорт имараттарынын оңдоо иштерине, спортчуларга демөөрчүлүк кылып келебиз. Бул ирет облустагы төрт райондун бирден күрөш залына олимпиадалык стандарттагы маттарды алып бердик. Биз ишенебиз биздин жаш спортчулар келечекте жакшы жетишкендиктерге жетээрине”, – деди ал.
КРнын Улуттук Олимпиада комитетинин өкүлү Марат Аскарбеков компаниянын мындай колдоосу Талас облусундагы жаш муундун спорт менен жакын болушуна жакшы жардам болгонун баса белгилеп, колдоосу үчүн ыраазычылыгын билдирди. Ошондой эле машыктыруучулар менен курөш залындагы жаш спортчулар жаңы күрөш килемдеринин келгендерине кубанчта. Алардын бири Кууганды айыл аймагындагы курөш залынын машыктыруучусу Кылычбек Курманалиев буга чейинки курөш килемдери эскилиги жетип калганда, жаңы килемдердин келиши алар үчүн чоң жардам болгонун айтты.
Күрөш килемдери тапшырылган ар бир залда 100гө жакын жаш спортчулар тарбияланып келишет. Алардын айрымдары өспүрүмдөр арасында Республиканын чемпиондору.
