Жогорку Кеңештин депутаты Өмүрбек Бакиров өзүнө карата саясий кысым болуп жатканын айтты. Бул тууралуу ал ПолитКлиника медиасына берген маегинде билдирген.
«Бүгүн эле мага маалыматтар келди, Жаңы-Ноокаттан өзбек туугандарды алып чыгып, чөнтөгүнө баңги салып, диний уюмдардын китептерин үйүнө таштап, «Бакировго каршы көрсөтмө бербесең мына ушул беренелер боюнча камаласың» деген коркутуу-үркүтүүлөр жүрүп жатыптыр. Ар тараптан саясий кысымдар болуп жатат» , — деди депутат.
Эске салсак,17-ноябрда Жогорку Кеңештин жалпы жыйынында депутат Өмүрбек Бакиров менен УКМКнын жетекчиси Камчыбек Ташиев кайым айтыша кеткен. Бакиров Ташиевге кыргыз-өзбек чек арасындагы Керкедан аймагы боюнча суроо узаткан.
Ошол эле жыйында «Ата журт-Кыргызстан» фракциясынын депутаты Фархад Исмаилов УКМК башчысына болушуп, Бакиров менен мушташа кете жаздаган.
Кийин Өмүрбек Бакировдун Жогорку Кеңештеги кызматтык бөлмөсү алмаштырылган. Ал 7-кабаттагы бөлмөсүнөн чыгарылып, башка бөлмө берилгени тууралуу сүрөт социалдык тармактарга тараган.
