Бишкектеги соода борборлордун биринде унаасында граната табылып, кийин коркутуулар болуп жатканын айтып, Россияга чыгып кеткен активист Илгиз Шаменов Москвада кармалды. Бул тууралуу ал социалдык тармактагы баракчасында билдирди.
Анын айтымында, ал 27-октябрда кармалган Жогорку Кеңештин мурдагы депутаты Орозайым Нарматова менен бирге бүгүн саат 15:00до Бишкекке учуп келет. Шаменов алар «бийликти курал менен басып алууга» шектелип, эл аралык издөөгө жарыяланганын белгиледи.
Эскерте кетсек, Кыргызстанда жыйырмадан ашык активист жана саясатчы «массалык башаламандыктарды уюштурууга даярдык көрүүгө» шектелип камакка алынган. Кармалгандар буга чейин Кемпир-Абад суу сактагычынын Өзбекстанга берилишине каршы чыгып келишкен.
Илгиз Шаменов менен Орозайым Нарматова да Кемпир-Абаддын Өзбекстанга берилишине каршы чыгып, элди тынчтык митингдерге чыгууга чакырып келген. Алардын кармалышы активисттерге ачылган ишке тиешеси барбы азырынча белгилүү боло элек.
