Фейсбук колдонуучусу Эрлан Аскаров орус тилдүү кыргыз классында окуган кызынын бешинчи класстын кыргыз тилиндеги китептеги бир нече мүчүлүштүктөрдү таап чыккан
-Кызымдын сабактарын карап отуруп, бир жагдайга көзүм кадалып, көңүлүм чөгө түштү. Балким кеп кыла турчу деле маселе эместир.
Бирок, Кыргыз өлкөбүздүн келечеги деген жеткинчектерибиздин калыптануу маалында майда, боло берет деген түшүнүк болбошу керек деп ойлойм. Себеби мекенге болгон сүйүү, өлкөбүздүн өзөгүн түзгөн улутубузга жан дилден күйүү, эгемендүү өлкөбүздүн сакталышына, калыптанышына өмүрүн арнаган аталарыбызды барктоо, баалоо сезимин жаш муунга калыптандырууда ар бир нерсе маанилүү!Эмнеден көңүлүм түштү?Кызымдын Кыргыз тили боюнча китебин окуп баштаганда эле Ганнибал Абрам Петровичтин укум тукуму көрүндү.
Ал кадимки Пушкиндин ата теги экен. Александр Сергеевичке эч кандай каршылыгым деле жок. “Алтын балык” жомогун жакшы көрүп эле окугам. Ооба, кызым орус класста окуйт. Бирок бул жалаң орусча өтүлгөн сабактар арасында жалгыз Кыргызча өтүлчү сабак. Кыргыз тили сабагы го. Жок дегенде ушул сабактын китебине Манас атабыздын же башка Кыргызга аты чыккан даңктуу инсаныбызды мисал кылса болот беле деп ойлондум. Себеби бизди мектепте жети атаңды бил деп какшап окутту эле. Жети атаны билүү Кыргызга аманат эмеспи. Андан ары улай сүрөттөр көзгө урунду.
Көпчүлүгү “Сэм” байкебиздин уул-кыздарынын сүрөтү. Интернеттен көчүрүп коё бергендин жыйынтыгы деп койдум. Эми ушундай бүтүндөй бир муунга акыл кошо турчу китепке өзгөчө көңүл буруп, фотосессия уюштуруп койсо деле кантет эле дедим.Беттеп отуруп Кыргызстанымдым картасына жеттим. Ал жерде бүгүнкү күндө ар бир мекендешибиздин жүрөгүн өйүтүп турган Баткенимдеги “Ворух” кашайып анклав болбой эле коридор ачылып, коңшу өлкөнүн бүтүн аймагына кошулуп калган экен.
Барактап отуруп мисалдардан көзүм алынбайт:- атактуу хирург Николай Васильевич, дарыгер Сергей Петрович, макалчы Владимир Иванович, падыша Петр l, сайма сайганды жакшы көргөн Арнольд Шварценеггер ж. б. Албетте китепте Кыргыз жерлеринин сүрөттөрү, Кыргызча аттар деле бар экен. Мунусуна да рахмат.Бирок эмнегедир биз окуучу кезде Орус тили, же адабиятында Кыргыздын инсандары жөнүндө окуган эмес элек. Биз Пушкиндин ” Няня” Есениндин “Шагане ты моя…” деп окуганбыз. Бул туура эле көрүнүш. Эми Орус тили адабияты менен таанышып, үйрөнүп аткан соң, ошол элдин маданиятын, атактууларын окуш кадыресе көрүнүш. А эмнеге Кыргызстанда орус класстарда Кыргыз тили сабагында андай эмес. Ооба, орус класс болгон соң “орустукун түртүп сиңирет” дечи.
Бирок жок дегенде кыргыз тили, адабияты сабагында Кыргыз баалуулуктары айтылып жаңырып турсунчу. Авторлор жалаң кыргыз эле өңдөнөт, бир ушуну эске алып койсо деген үмүттөмүн.Улуттук идеология эле дейбиз, мындай идеология менен жакынкы келечекте Кыргыз деген эле оозеки куру ат калчудай. Ал да калса. Өзөгү да, улуттук өзгөчөлүк, нарк – насил да калчудай эмес…
Кызым орус тилинен кыйналбасын деп орус класска бердим эле, эми айный баштадым. Мындай деле үйрөнүп алаар, бирок Кыргыз наркын жоготпосунчу, – деп жазган ал.
