Путин ЖККУнун саммитине катышуу үчүн Кыргызстанга келет. Бул тууралуу бүгүн Соода-экономикалык, илимий-техникалык жана гуманитардык кызматташуу боюнча өкмөттөр аралык кыргыз-орус комиссиясынын 26-жыйынында белгилүү болду.
Минкаб төрагасы Адылбек Касымалиев бул жолугушуунун өтүшү достуктун көп жылдык салттарына, тарыхый жакындыкка жана биздин мамлекеттердин ортосундагы жогорку деңгээлдеги өз ара түшүнүшүүгө негизделген эки тараптуу мамилелердин туруктуу өнүгүүсүнүн айкын далили болуп саналарын билдирди.
“Биздин мамлекеттердин делегацияларына конструктивдүү мамилеси жана биздин жолугушууга активдүү катышкандыгы үчүн, ошондой эле жолугушуунун алдында салтка айланып калган даярдык иштерине жана эксперттик талкууларга ыраазычылык билдиргим келет”,-деди минкаб төрагасы.
Ал ошондой эле Россия Кыргызстандын ишенимдүү өнөктөшү жана стратегиялык өнөктөшү экенин дагы бир жолу белгилеп өттү.
“Биздин өлкөлөрдүн лидерлери – урматтуу Садыр Нургожоевич Жапаров жана урматтуу Владимир Владимирович Путин – союздаштык жана стратегиялык өнөктөштүк мамилелерин прогрессивдүү өнүктүрүү жана чыңдоо үчүн туура кадам жасап жатышат.
Биздин өлкөлөрдүн ортосунда калыптанган саясий ишенимдин жогорку деңгээли бардык тармактарда кызматташууну мындан ары тереңдетүү үчүн бекем негиз болуп кызмат кылат.
Биз Россия Федерациясынын президенти, урматтуу Владимир Владимирович Путиндин ЖККУнун Жамааттык коопсуздук кеңешинин жыйынына катышуу үчүн боло турган сапарына чоң маани беребиз.
Эки өлкөнүн өкмөттөрү, ошондой эле биздин тышкы саясат жана экономика министрликтери үчүн алдыдагы сапардын олуттуу бөлүгүн толтуруу үчүн күч-аракеттерин активдештирүү маанилүү”,-деди Касымалиев.
