Бүгүн, 25-февралда Бишкек шаарындагы «Чоң-Арык» конушунда жайгашкан № 2 үй-бүлөлүк медицина борборунун жаңы филиалы ачылды. Шаардык бюджеттен аталган үй-бүлөлүк медицина борборун курууга 145 миллион сом бөлүнгөн. Бул тууралуу мэриядан билдиришти.
Маалыматка ылайык, жаңы имарат бул аймактагы тургундарды сапаттуу медициналык жардам менен камсыз кылууга багытталып, 26 000ден ашуун адамга кызмат көрсөтөт. Мында дарыгерлердин кабинеттери, ЭКГ, УЗИ, рентген, физиотерапия кабинеттери, стерилизациялоо, техникалык жана чарбалык имараттар жайгашкан. Ошондой эле бейтаптар үчүн лифт жана санитардык түйүндөр каралган. Долбоордун алкагында жанаша жайгашкан аймакты көрктөндүрүү жана жашылдандыруу иштери аткарылып, борборду заманбап гана эмес, медициналык жардам көрсөтүү үчүн ыңгайлуу жайга айландырды.
Иш-чарага Жогорку Кенештин депутаты Марлен Маматалиев, саламаттык сактоо министринин орун басары Каарманбек Байдавлетов, Бишкек шаарынын мэринин орун басары Виктория Мозгачева, саламаттык сактоо уюмдарынын жетекчилери жана Үй-бүлөлүк медицина борборунун жамааты катышты.
Белгилей кетсек, бул иштер Бишкек шаарынын мэриясынын Капиталдык курулуш башкармалыгы тарабынан жүргүзүлгөн, ал эми подряддык уюм катары «Эсир Компании» ЖЧКсы катышкан.
ҮМБнын № 2 филиалы 1996-жылы түзүлүп, бир нече жылдар бою «Чон-Арык» айылында жана «Орок» конушунда жайгашкан. Бирок убакыт өткөн сайын имараттар жараксыз абалга келип, фундаменти чөгүп, дубалдары кулап, бейтаптарды кабыл алуу шарттары талапка жооп бербей калган. Бул себептүү Бишкек шаарынын мэриясынын чечими менен «Чон-Арык» конушундагы, Семетей көчөсү 6 дареги боюнча 2,3 гектар аянтка жаңы медициналык мекеме куруу үчүн жер бөлүнгөн.
2024-жылы курулуш башталып, 2025-жылдын февралында расмий ачылды.
