Дача конуштарына айыл статусун ыйгаруу боюнча мыйзам долбоору Жогорку Кеңеште үчүнчү окууда кабыл алынды.
Белгилей кетсек, дача ээлеринин болжол менен 15 пайызы мыйзам долбооруна каршы болгон. Бирок, айыл статусунун ыйгарылганы дачалардын жашоочуларына жашоого уруксат алуу жана муну менен катар мамлекеттик кызматтарды алуу жана шайлоого катышуу мүмкүнчүлүгүн берет.
Бир катар депутаттар мыйзам долбооруна толуктоолорду киргизип, өзгөртүүлөргө макул болбогон бул 15 пайызга жеке адам катары дагы дачаларга ээлик кылуу мүмкүнчүлүгүн берүүнү каалашкан, бирок парламенттин вице-спикери Нурланбек Азыгалиев депутаттардын документти экинчи окууга кайтаруу сунушун добушка койбой, мыйзам долбоору ушул формада кабыл алынды.
Кошумчалай кетсек, мыйзам долбоорунда мамлекеттин жана коомдун кызыкчылыгы үчүн жерди басып алууга жол бере турган берене бар. Дастан Бекешев аны кайра карап чыгуу керек деп эсептейт. Анткени жаран жер тилкесин өз ыктыяры менен мамлекетке өткөрүп бергенде анын баасын тараптар аныктайт. Ал эми алып койгондо сот аныктайт, бирок анын баасын кантип аныктоо керектиги айтылган эмес.
