Бул тууралуу Чүй ОИИБден кабарлашты.
Маалыматка ылайык, өткөн жылдын 21-ноябрында Чүй облусунун Ысык-Ата районунун Таш-Башат айылынын аймагында, денесинде ар кандай жаракаттары бар, жерге көмүлгөн болжол менен 45-50 жаштагы белгисиз адамдын сөөгү табылган.
Соттук-медициналык эксперттин катышуусу менен өлүктү кароо учурунда, денесинен көптөгөн бычактан жаракат алгандыгы аныкталган.
Бул факты Ысык-Ата РИИБге катталып, Кылмыш-жаза кодексинин 122-беренесинде (адам өлтүрүү) каралган кылмыштын белгилери менен кылмыш иши козголгон.
«Бир катар ыкчам-тергөө иш-чараларынын жүрүшүндө маркумдун өздүгү такталып, анын 1974-жылы туулган жаран экендиги аныкталган. Ал Бишкек шаардык Октябрь РИИБи тарабынан 2022-жылдын 18-октябрынан бери изделип жатканы аныкталган. Кылмыш ишине шектүү катары 1997-жылы туулган жаран аныкталып, кармалып, убактылуу кармоочу жайга киргизилген»,-деп айтылат маалыматта.
Тергөөнүн жүрүшүндө бул кылмыш мүлк талашуудан улам келип чыкканы аныкталган.
Тергөө уланууда.