2022-жылы өлкөдө түрдүү тармактарда жеңиштер болуп, жагымдуу кабарлар тарап жатты. Bulak.kg маалымат порталы ушул жылы Кыргызстанда кандай жеңиштер болгонун жана аларды ким алып келгенин эстеди.
Кыргызстандык балбан Акжол Махмудов грек-рим күрөшү боюнча Сербияда өткөн дүйнө чемпионатын жеңип алды. Каршылашы венгриялык Золтан Леваини 77 кг салмагында 8:0 эсебинде жеңип, дүйнө чемпиону аталды.
Махмудов грек-рим күрөшүнөн чоңдор арасында дүйнө чемпионатын жеңген алгачкы спортчу болду.
Ошол эле дүйнө чемпионатында Жоламан Шаршенбеков да грек-рим күрөшү боюнча дүйнө чемпиону аталды. Ал 60 кг салмакта финалда болгариялык Эдмонд Армен Назарянды 11:2 эсеби менен мөөнөтүнөн мурда утту.
Жоламан чоңдор арасында дүйнө чемпионатынын финалында 3-жолу күрөштү. Ага чейин эки күмүш медалы бар эле.
Кыргызстандык боксчу Дмитрий Бивол кезектеги атаандашы мексикалык жеңилбеген Хильберто Рамирести жеңип алды. Бул жеңиши аркылуу Бивол WBA версиясы боюнча жарым оор салмактагы чемпиондук курун коргоп калды.
Бивол беттешке жай айларында Ысык-Көлдө даярданган.
Кыргызстандык киберспортчу Бакыт Эмилжанов эл аралык Dota 2 мелдешине Европанын Team Secret командасы менен катышып, 2,4 млн. доллар утуп алды.
Сингапурдагы мелдешке жалпы 30 команда катышып, Эмилжановдун командасы финалда 3-0 эсебинде утулган. 23 жаштагы кыргыз спортчусу аталган командада быйыл июль айынан бери ойнойт.
Бишкекте ноябрда өткөн күжүрмөн самбо боюнча дүйнө чемпионатында Дайырбек Карыяев чемпион аталды. Ал 79 кг салмагында финалда казак балбанын 4:0 эсебинде жеңип, дүйнө чемпиону болду.
Ошондой эле, спорттук самбо боюнча 98 кг оор салмагында чыккан Бекболот Токтогонов да дүйнө чемпиону аталды.
Бильярдчы Дастан Лепшаков Орусияда өткөн бильярддын эркин пирамида түрүнөн дүйнө чемпиону аталды. Лепшаков — эл аралык класстагы спорт чебери. Дүйнө чемпиондугун экинчи ирет багындырды.
Астанада «Digital Bridge 2022» эл аралык технологиялык форумунда Astana Hub Battle – технологиялык стартап-долбоорлор мелдеши өткөн.
Анда Кыргызстандын NB Fit командасы төрөттөн кийин аялдарга жардам бере турган фитнес кызматы долбоору менен жеңүүчү аталышты.
