Сары-Челек биосфералык коругунун кызматкерлери маралды мыйзамсыз аткан адамдардын тобун кармашты. Бул тууралуу Жаратылыш ресурстары министрлигинин басма сөз кызматы билдирди.
Маалыматка ылайык, окуя 31-октябрда болгон. Мыйзамсыз атылган маралдын терисин текшерип, болжол менен 5 жашта экенин аныкташкан.
«Маралды Аксыдагы Аркыт айылынын 4 жашоочусу аткан. Кызыл китепке кирген жаныбардын өлүмү боюнча далил буюмдар алынып, тиешелүү чара көрүү үчүн материалдар укук коргоо органдарына берилди»,-деп айтылат маалыматта.
Белгилей кетсек, маралды мыйзамсыз атуу үчүн айып 1 миллион сомду түзөт, ал эми өзгөчө корголуучу жаратылыш аймактарында айыптын өлчөмү эки эсеге көбөйөт.
