Бул тууралуу Талас ОИИБдин басма сөз кызматы билдирди.
Маалыматка караганда, бүгүн, 24-июнь күнү Бакай-Ата РИИБне кызматтык пайдалууга “Нива” үлгүсүндөгү жаңы авто унаа тапшырылды. Унааны тапшыруу салтанаттуу иш-чара аземине Кыргыз Республикасынын Жогорку Кеңешинин депутаттары Шаирбек Ташиев, Руслан Жакышов жана Айгуль Айдарова, Талас ОИИБдин башчысы милициянын полковниги Азамат Токтоналиев жана Бакай-Ата РИИБдин өздүк курамы катышты.
“КРнын ЖК депутаттары куттуктоо сөздөрүн айтышып, бул унаа милициянын жумушун жеңилдетип, окуя болгон жерге ыкчам барып, кылмыштуулук менен күрөшүүдө өз салымын кошоорун айтышты. Бакай-Ата райондук Ички иштер бөлүмүнө милицияга ылайыктуу, толук жабдылган “НИВА” авто унаасы эл өкүлдөрүнүн демөөрчүлүгү менен каржыланды. Андан тышкары алар Бакай-Ата РИИБдин имараты менен таанышып, кызматкерлердин иштерине ийгиликтерди каалап күч дем берип кетишти. Башкармалыктын башчысы Азамат Токтоналиев эл өкүлдөрүнө ыраазычылык айтып, ички иштер органдарынын кызматкерлери коомдук коопсуздукту камсыздап, мындан ары да облустун аймагында жигердүү ишмердүүлүк алып бараарын билдирди”, – деп айтылат маалыматта.
