Кыргызстанда биринчи жолу баңгизат саткан онлайн дүкөндүн түзүүчүсү кылмыштуу кирешелерди легалдаштыруу (адалдоо) жана психотроптук заттарды сатуу үчүн 13 жылга эркинен ажыратылды. Бул тууралуу Ички иштер министрлигинин басма сөз кызматы билдирди.
KG_Svetofor интернет-дүкөнүнүн ээси Telegram мессенджеринде баңгизаттарды активдүү жарнамалаган. Ал 2022-жылы баңгизат сатуу боюнча шериги менен кармалган. Тактап айтканда, аларга Кылмыш-жаза кодексинин “Баңги каражаттарын, психотроптук заттарды жана алардын аналогдорун сатуу максатында мыйзамсыз даярдоо” жана “Кылмыштуу кирешелерди легализациялоо” беренелери боюнча айып тагылган.
Кылмыштуу жол менен табылган акчанын суммасы 2 миллион сомдон ашык. Сот 32 жаштагы Л.Ильяны күнөөлүү деп таап, жалпы режимдеги түзөтүү колониясында 13 жылга эркинен ажыратты. 22 жаштагы И.Надеждага 80 миң сом айып салынды.
