Шайлообек Атазов бүгүн парламенттин трибунасынан ант берип, кызматка киришти.
Буга чейин Борбордук шайлоо комиссиясы Шайлообек Атазовго Жогорку Кеңештин депутаттык күбөлүгү жана төш белгисин тапшырды.
Эскерте кетсек, 2021-жылдын 28-ноябрында Жогорку Кеңешке депутаттарды шайлоо өтүп, анда Атазов Төлөйкан шайлоо округунан депутаттыкка аттанган. Бирок Нурбек Алимбековго жеңилип калган.
2022-жылдын 27-февралында Бишкектин Свердлов округунда кайра шайлоо дайындалганда Атазов кайрадан талапкерлигин көрсөткөн. Свердлов округундагы шайлоонун жыйынтыгында ал 16,28% менен экинчи орунду алган. Жеңип чыккан Абдурахманхаджи Муртазалиев добуш сатып алууга шектелип жаткандыктан, БШК аны каттоодон баш тарткан. Мындан улам экинчи орунду алган Шайлообек Атазов депутат болду.
