Улуттук коопсуздук боюнча мамлекеттик комитеттин башчысы жана ошол эле учурда Кыргыз футбол биримдигинин президенти Камчыбек Ташиев 20 жашка чейинкилердин Испаниядагы машыгуу – жыйыны менен таанышты. Бул тууралуу аталган биримдиктин басма сөз кызматы билдирди.
Бир күн мурда өлкөнүн жаштар курамасы алгачкы жолдоштук беттешин өткөрдү. Кыргыз курамасы Испаниянын экинчи дивизионунда (Сегунда) ойногон «Картахена» клубун 5:0 эсебинде утуп алды.
Камчыбек Ташиев футболчуларды жеңиши менен куттуктап, спортчулардын Азия Кубогуна жакшы даярдыгын белгиледи.
Эске сала кетсек, 3-январдан тарта кыргызстандык футболчулар февралда Кытайда баштала турган Азия кубогунун финалдык этабына даярдык көрүү максатында Аликанте шаарында окуу-машыгуу жыйындарын өткөрүп жатышат.