Ош облустук ички иштер башкы башкармалыгынын кызматкерлери тарабынан баңгизаттарды мыйзамсыз жүгүртүү фактысы аныкталды, – деп билдиришти облустун басма сөз кызматы.
Тартип сакчыларына Кара-Суу районунун Фуркат айылында белгисиз жаран баӊги каражаттарын жанында алып жүрөт деген маалымат келип түшкөн.
Жүргүзүлгөн ыкчам-тергөө амалдарынын натыйжасында Ош облусунун Кара-Суу районунун аймагындагы жолдун боюнда Өзгөн районунун тургуну 50 жаштагы Г.Н. кармалган.
Шектүү кармалган учурда анын жанында болгон баштыктын ичинде таңгакталган өзгөчө жыты бар зат алынган.
Кармалган жаранга кароо жүргүзүлгөндө үстүндөгү кийип турган спорттук шымынын чөнтөгүнөн тамекинин фалигасына оролгон зат алынган. Алынган заттарга тергөө кызматы тарабынан соттук-химиялык экспертиза дайындалган.
Экспертизанын корутундусуна ылайык, алынган заттар салмагы 0,78 граммды түзгөн “гашиш” жана 1 кг. 790,42 граммды түзгөн “апийим” баӊгизаттары экендиги аныкталган.
Тергөө амалдарынын жүрүшүндө шектүүнүн үйү тинтүүгө алынып, салмагы 22,5гр. болгон өзгөчө жыты бар баңгизатына окшогон зат алынды.
Учурда Кыргыз Республикасынын Кылмыш-жаза кодексинин 282-беренесинин 3-бөлүмүнүн негизинде козголгон кылмыш ишине тиешеси бар башка атуулдарды аныктоо боюнча тергөө амалдары жүргүзүлүүдө.
