Бул тууралуу аталган мекемеден билдиришти.
Маалыматка караганда, УКМК тарабынан жүргүзүлгөн КРнын аймагындагы диний-экстремисттик жана террористтик уюмдарга каршы аракеттенүү боюнча алдын алуу жана профилактикалык иш-чаралардын алкагында, “Хизбут-Тахрир” ДЭУнун мүчөлүгүнөн баш тартуу боюнча иш алып барууда.
“Жүргүзүлгөн профилактикалык иш-чаранын натыйжасында Кыргыз Республикасынын 1985-жылы туулган, Бишкек шаарынын А.Н.М. аттуу тургуну радикалдык көз карашынан баш тартты. Ал 2022-жылдан бери “Хизбут-Тахрир” ДЭУнун кылмыштуу ишмердүүлүгүнө катышып, экстремисттик жашыруун топтордун активдүү кызматкерлери менен байланышта болгон.
Профилактикалык иш-чаралардын жүрүшүндө А.Н.М. тандап алган диний багытынын туура эместигин моюнга алып, бул уюмдун ишмердүүлүгүнө жол берилбестигин билдирүү менен жарандарды “Хизбут-Тахрир” ДЭУнун мүчөлөрүнүн мыйзамсыз чакырыктарына алданбоого чакырды”, – деп айтылат маалыматта.
Учурда КР УКМК тарабынан “Хизбут-Тахрир” ДЭУнун ишмердүүлүгүн аныктоо жана бөгөт коюу, ошондой эле аталган диний-экстремисттик уюмдун мүчөлөрүнүн арасында профилактикалык иш-чараларды өткөрүү боюнча иштер улантылууда.
