Ноокат райондук жарандык абалдын актыларын каттоо, калкты паспорттоштуруу жана каттоо бөлүмүндө мыйзамсыз түрдө акча жыйноо фактылары аныкталды, деп билдирет УКМКнын басма сөз кызматы.
Маалыматка караганда, УКМК Ош шаары жана Ош облусу боюнча башкы башкармалыгы тарабынан жүргүзүлгөн комплекстүү ыкчам-издөө иш-чараларынын жана тергөө амалдарынын жүрүшүндө, Ош облусунун Ноокат райондук жарандык абалдын актыларын каттоо, калкты паспорттоштуруу жана каттоо бөлүмүнүн аймактык бөлүмчөсүнүн кызмат адамдары тарабынан мыйзамсыз түрдө акча жыйноо фактылары аныкталып, КР Кылмыш-жаза кодексинин 337-беренесинин 2-бөлүмү (Кызмат абалын кыянаттык менен пайдалануу) менен кылмыш иши козголгон.
Иштин материалдарына ылайык, Жарандык абалдын актыларын каттоо, калкты паспорттоштуруу жана каттоо бөлүмүнүн жетектөөчү адиси Ш.С.А. жарандык абалдын күбөлүктөрүн берүү жана чет өлкөлүк жарандарды убактылуу каттоо боюнча кызматтарды көрсөткөндүгү үчүн жарандардан жыйымдарды туруктуу алып туруу схемасын жетектегени аныкталды.
Учурда УКМК Ош шаары жана Ош облусу боюнча башкы башкармалыгы тарабынан кылмышкерлерди аныктоо жана жоопко тартуу боюнча тиешелүү иш-чаралар улантылууда.
