“Бүтүн Кыргызстан” партиясынын саясий кеңешинин мүчөсү Акыл Айтбаев кармалды. Маалыматты ал өзү 24.kg агенттигине тастыктады.
Ал азыр Бишкек ШИИБге жеткирилип жатканын тактады.
«Эч нерсе түшүндүрүшпөй, алар менен Бишкек ШИИБге барышымды суранышты. Бул Кемпир-Абадга байланышы барбы деген суроомо, оң жооп беришти. Кечээ биз жокто үйгө милиция келиптир», – деп кошумчалады активист.
Буга чейин Акыл Айтбаев кыргыз-өзбек чек арасы тууралуу социалдык тармактарга жазганы үчүн суракка алынган.
Эскерте кетсек, кечээ, 23-октябрда массалык камакка алуулар башталган. 21 адам Бишкек шаарынын жана Чүй облусунун райондорунун ички иштер башкы башкармалыгынын УККсына киргизилди. Жогорку Кеңештин экс-депутаты Канат Исаев дагы борбор калаанын СИЗО-1 абагына бир айга камакка алынды. Алардын үйлөрүндө тинтүү жүргүзүлүп, андан соң активисттер менен саясатчыларды камакка алуу боюнча токтомдор чыгарылган.
Акыркы маалыматтарга караганда, Кеңешбек Дүйшөбаев, Эрлан Бекчороев, Айданбек Акматов, Асия Сасыкбаева, Рита Карасартова, Атай Бейшенбек, Клара Сооронкулова, Азимбек Бекназаров, Айбек Бузурманкулов, Жеңиш Молдокматов, Бектур Асанов, Нурлан Асанбаев, Гүлнара Журабаева, Равшан Жээнбеков, Таалай Мадеминов, Улугбек Маматаев, Перизат Суранова, Чыңгыз Капар, Али Шабдан уулу, Талант Эшалиев, Кубанычбек Кадыров 48 саатка камакка алынышты.
