Бүгүн, 10-августта Жогорку сотто былтыр жазында уурдалып, киши колдуу болгон Айзада Канатбекованын иши боюнча апелляциялык арызды кароо боюнча отурум кийинкиге жылдырылды.
Отурумга айыпталуучу Ажикабыл Рысбай уулунун жактоочусу Ырысалы Осмонкул уулу келе албагандыктан, соттук процессти кийинкиге жылдырууну өтүнгөн. Сот бул өтүнүч боюнча соттолуучу жана жабырланучу тараптын пикирин уккандан кийин отурумду 16-августка белгиледи.
Эскерте кетсек, былтыр 5-апрелде Айзада Канатбекованы топ балдар унаага салып уурдап кеткен. Эки күндөн кийин Канатбекованын жана аны уурдаган Замирбек Теңизбаевдин сөөгү Бишкектин четиндеги айылдан табылган. Айзаданы уурдоого катышкан адамдар кармалып, аларга иш козголгон.
Сентябрь айында Биринчи май райондук сотунун чечимине ылайык, Айзада Канатбекованы уурдоого катышкан Ажикабыл Рысбай уулу, Сыймык Молдосариев жана Орузбек Нурумбетов 7 жылга, Кубаныч Токон уулу жана Замирбек Раманкулов 6,5 жылга эркинен ажыратылган.
Соттун өкүмүнө ылайык, айыпталып жаткан тарап Айзаданын жакындарына моралдык жана материалдык зыян катары 100 миң сом төлөп бермекчи болгон. Соттун бул өкүмүнө макул болбогон жактоочу кийинки сот инстанциясына апелляциялык арыз менен кайрылган.
Айзада Канатбекованын уурдалышы боюнча иште тиешелүү чара көрбөй, шалаакылык кетирген Биринчи май райондук милициясынын кызматкерлерине да иш козголгон. Бирок милиция кызматкерлери тартиптик жаза менен гана чектелип, четинен ишке кайтып келе баштаган.
Жактоочу Нурбек Токтакуновдун айтымында, милиция кызматкерлерине ачылган иш мурда эле токтотулган. Ошол эле учурда коомчулук жана Айзада Канатбекованын апасы Назгүл Шакенова шалаакылык кетирген милиция кызматкерлерин да кылмыш жоопкерчилигине тартуу боюнча президентке кайрылган.
