Бишкек шаарындагы Октябрь жана Свердлов райондорунун акимдерине сөгүш жарыяланды. Бул тууралуу Бишкек шаардык мэриясынан билдиришти.
Маалыматка караганда, алар калкты коронавируска каршы эмдөө боюнча иш-чараларды толук кандуу уюштурушкан эмес. Борбор калаага караштуу 4 райондун ичинен Октябрь жана Свердловдо коронавируска каршы эмделген жарандардын саны аз.
— Октябрь районунда биринчи доза менен 29 миң 47 адам (24%), экинчи доза менен 23 миң 760 киши (17%) эмделген. Бул райондо жалпы 121 миң 101 адам коронавируска каршы эмделсе болот;
— Свердлов районунда биринчи доза менен 29 миң 719 адам (27,6%), экинчи доза менен 25 миң 484 киши (23,7%) эмделген. Бул райондо жалпы 107 миң 587 адам коронавируска каршы эмделсе болот.
Ошондой эле борбор калаанын мэриясынын саламаттыкты сактоо башкармалыгынын жетекчисине эскертүү берилди.
Кошумчалай кетсек, Октябрь районунун акими — Мирлан Эшкожоев, Свердлов районунун акими — Бахтияр Карамшаков. Бишкек шаардык саламаттыкты сактоо башкармалыгынын жетекчиси — Айбек Ибраимов.
