Талас ШИИБнин начальниги Асрол Тантиев жетектеген өздүк курамы менен ИИОнун ардагери милициянын отставкадагы прапорщиги Бейшенов Сабырбек агабызга атайын кам көрүү максатында материалдык жактан, тактап айтканда акчалай жардам көрсөтүшүп жана кышкыга үйүн жылытууга бир тонна көмүр алып тапшырып келишти. Бейшенов Сабырбек агабыз өмүр бою милицияда кызмат кылып ак эмгегин өтөп келген. Учурда ал 80 жаш куракта. Талас ШИИБнин начальниги милициянын полковниги Асрол Тантиев ардактуу карыянын ал акыбалын сурап дагы көп өмүр сүрүп, милицияга жана азыркы коомго акылман насаатчы болуп жүрүшинө тилектештигин билдирди. Сабырбек атабыз милиция кызматерлерин көрүп, кубанычында чек жок. “Формачандарды көрсөм жүрөгүм жылыйт, жаштыгымды эстеп жашара түшөм”-деп бир далай башынан өткөн окуяларын, кылмыштарды ачканын жана ошол мезгилдеги иштеген учурларын айтып абдан кызыктуу маек куруп берди. Сөзүнүн аягында Талас шаардык ички иштер бөлүмүнүн кызматкерлерине жана жетекчисине ыразычылыгын билдирип, эл жерде тынчтык болуусун анын арасында милициянын кадыр-баркы жогорулап, элдин алкышын алуусун тилек кылып ак батасын берип жакшы маанайда узатты.
Талас ОИИБнин басма-сөз кызматы
