Президент Садыр Жапаров парламенттик шайлоонун таза өтүшү тууралуу маселе боюнча 21-октябрь күнү жалпы республикалык кеңешме өткөрөт. Бул тууралуу мамлекеттик катчы Сүйүнбек Касмамбетовдун 12-октябрда алдыдагы парламенттик шайлоого байланыштуу кайрылуусунда айтылат.

«Кеңешмеге айыл өкмөттөрдөн баштап, өкмөт башчысына чейин бардык жетекчилер катышат. Ошол жерде кеңири сөз болот», – деди Касмамбетов.

жаңы дайындалган мамлекеттик катчысы Сүйүнбек Касмамбетов бүгүн, 12-октябрда, алдыдагы парламенттик шайлоолорго байланыштуу кыргызстандыктарга кайрылуу жасады. Бул тууралуу президенттин администрациясынан билдиришти.

Мамлекеттик катчы Сүйүнбек Касмамбетов төмөнкүлөрдү белгиледи::

«Урматтуу замандаштар!

“Элди тажаткан, коомду ириткен саясатчылардан арылып, люстрация кылуу керек” деген талап көптөн бери айтылып келет.

Эң туура! Бул мүдөөнү баарыбыз колдойбуз. 15 жылдан бери люстрацияны ишке ашырабыз деп какшап келе жатабыз. Бирок ишке ашпай жаткан. Эми, мына, ишке ашыруу процесси башталды. Президент тарыхыбызда биринчи жолу люстрацияны жүзөгө ашыруу үчүн элге шарт түзүп берди. 36 депутат түздөн-түз аймактардан шайланып келишет. Өзүңөрдүн ишенген өкүлүңөрдү шайлап аласыңар. Бирөө-жарым кысым көрсөтүп, баланчаны шайлайсың деп кыйнай албайт. Мамлекеттик кызматкерлер тигил же бул талапкердин пайдасына иштебейт. Иштешсе жоопкерчиликке тартылып, жазасын алышат.

54 депутат партиялык тизме менен шайланат. Мурдагыдай тизме башына төбөсү көрүнгөн, акчалуу саясатчы туруп алып, партиясын өткөрүп, артынан 20-30 элге жакпаган депутаттарды ээрчитип келмей жок. Эми мындан ары партияга добуш берип, анын ичиндеги өзүңөргө жаккан талапкерге дагы добуш бересиңер. Добуш албаган талапкер өтпөйт. Мына силер жасай турган люстрация, урматтуу замандаштар!

Айрым радикалдуу жарандарыбыздын оюна койсо, “жакпаган саясатчылардын баарын тизип туруп атыш керек” дешет. Азыр 21-кылым. Андай кылган болбойт. Азыркы метод — эң туура метод. Саясатчымын деген жаран үчүн элдин добушун албай, көпчүлүктүн ишеничинен кетип, парламентке өтпөй калуудан өткөн жаза жок. Мына жаза, мына люстрация деген ушул.

Эн негизгиси, өзүңүздөр добушуңуздарды сатпасаңыздар болду.

Тескерисинче, сатып алам дегендерди ашкерелеп, кармап берип турсаңыздар шайлоонун таза өтүшүнө чоң жардам берген болосуздар.

Шайлоонун таза өтүшү тууралуу маселе боюнча президентибиз 21-октябрь күнү жалпы республикалык кеңешме өткөрүп жатат. Айыл өкмөттөрдөн баштап, Өкмөт башчысына чейин бардык жетекчилер катышат.

Ошол жерде кеңири сөз болот», – деп айтылат мамлекеттик катчы Сүйүнбек Касмамбетовдун кайрылуусунда.

Президент Садыр Жапаров Министрлер кабинетинин төрагасы-президенттик аппараттын жетекчисинин милдетин аткаруучу кылып Акылбек Жапаровду дайындады. Ал эми жаңы Министрлер кабинетинин курамын парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитети карап, бир добуштан колдоп беришти.

Акылбек Жапаровду жаңы Конституцияга ылайык Министрлер кабинетинин төрагасы-президенттик аппараттын жетекчиси кызматына сунуштаганын мамлекет башчы Садыр Жапаров 12-октябрда жарыялады.

Ал социалдык түйүндөрдөгү расмий баракчасына Жапаров өлкө экономикасын кризистен алып чыгууга убада бергени менен түшүндүрдү.

Министрлер кабинетинин жаңы курамы: 

• Министрлер кабинетинин төрагасынын биринчи орун басары — Арзыбек Кожошев;
• Министрлер кабинетинин төрагасынын орун басары — Азиз Аалиев;
• Министрлер кабинетинин төрагасынын орун басары — Эдил Байсалов;
• Министрлер кабинетинин төрагасынын орун басары — УКМКнын төрагасы — Камчыбек Ташиев;
• Экономика жана коммерция министри — Данияр Амангелдиев;
• Финансы министри — Алмаз Бакетаев;
• Тышкы иштер министри — Руслан Казакбаев;
• Юстиция министри — Аяз Баетов;
• Транспорт жана коммуникация министри — Эркинбек Осоев;
• Энергетика министри — Доскул Мырзаев;
• Жаратылыш ресурстары, экология жана техникалык көзөмөл министри — Динара Кутманова;
• Эмгек, социалдык камсыздоо жана миграция министри — Кудайберген Базарбаев;
• Ички иштер министри — Улан Ниязбеков;
• Маданият, маалымат, спорт жана жаштар саясаты министри — Азамат Жаманкулов;
• Саламаттыкты сактоо жана социалдык өнүктүрүү министри — Алымкадыр Бейшеналиев;
• Билим берүү жана илим министри — Болотбек Купешев;
• Айыл, суу чарба жана аймактарды өнүктүрүү министри — Аскарбек Жаныбеков;
• Коргоо министри — Бактыбек Бекболотов;
• Өзгөчө кырдаалдар министри — Бообек Ажикеев.