2022-жылдын 8-сентябрь күнү саат 10:00дѳ ички иштер министринин биринчи орун басары Адылбек Бийбосунов Ош облусунун Чоң-Алай районунун жашоочулары менен жолугушту.
Андан сырткары Башкы прокурор Курманкул Зулушев, Министрлер кабинетинин Тѳрагасынын орун басары Бакыт Тѳрѳбаев, Кыргыз Республикасынын Президентинин Ош облусу боюнча ыйгарым укуктуу ѳкүлү Зияйдин Жамалдинов жергиликтүү тургундар менен жолугушууга катышты.
Жыйындын жүрүшүндѳ Чоң-Алай районунун жашоочулары жеке маселелери боюнча суроолорун беришти. Мындагы жашоочулар негизинен Чоң-Алай районунун аймагында кендерди иштеткен компаниялар соцпакеттерди төлөөсү, пенсия, жѳлѳк пул, мектептин курулушуна муктаждыктар, чек арага жакын жердеги жайыт маселеси боюнча кѳйгѳй, чек арадан ѳтүп кеткен малдарды кайтара албай жаткандары, таза суу маселеси боюнча кайрылышты.
Такталбай жаткан чек арадагы жерлерди тактоону тездетүү, буга чейин жоюлуп кеткен ветеринардык кызматты калыбына келтирүү, кѳп балалуу энелерге батыр эне статусун берүүдѳ документтештирүүдѳ пайда болгон кѳйгѳйлѳр ж.б маселелер тууралуу элдин кайрылуулары угулду. Бүгүн кайрылган жарандардын арыздарын жеринде тийиштүү кызматтар кабыл алышты.
Ал эми жарандар тарабынан ички иштер органдарынын ишмердүүлүгүнө байланышкан маселе кѳтѳрүлгѳн жок. Жеке кайрылган жарандарга ички иштер министринин биринчи орун басары Адылбек Бийбосунов жооп берип, жарандардын милиция кызматкерлеринин ишмердүүлүгүнѳ байланышкан арыз-даттануулар болсо, ар дайым кабыл алууга даяр экенинин жана ал багытта мыйзам чегинде чечилүүсү боюнча тыкыр кѳзѳмѳлгѳ ала тургандыгын билдирди.
Жолугушуу суроо-жооп форматында өтүп, анда жарандар бийлик өкүлдөрүнө жеке көйгөйлөрү, район ичиндеги социалдык-экономикалык маселелер боюнча суроолорун беришти.
Жыйындын катышуучулары ушундай жолугушууларды уюштуруп, жарандарга арыз-даттанууларын айтып алганга мүмкүнчүлүк түзүп беришкендиги үчүн ыраачылык билдиришти.
ИИМдин Басма сөз кызматы
