Казакстандагы Январь окуялары учурунда казак күч кызматкерлеринин кыйноосуна кабылганын билдирген кыргызстандык белгилүү музыкант Викрам Рузахунов акыйкаттык үчүн күрөшмөй болгонун айтып чыкты. 14-февралда анын видео кайрылуусу Интернеттеги социалдык түйүндөрдө жарыяланды:
“Мен бул тууралуу көп ойлондум. Музыкага жана бизнеске азырынча жөн кайта албайм, эч нерсе болбогонсуп карап тура албайм. Мен кабылган окуя КМШ мамлекеттериндеги укуктук чөйрөнү жакшыртууга, демократияны өнүктүрүүгө жардам берүү үчүн мыкты үлгү болуп, адам укуктары боюнча абалды жакшыртууга жардам болушу керек деп чечтим”.
Рузахуновго кыргызстандык адвокаттар жардам берерин билдиришти. Кайсы органдарга кандай талаптар коюлган арыздар жазылары азырынча так айтыла элек.
Казакстандагы Январь окуялары учурунда кармалып, кийин коомчулуктун кийлигишүүсүнөн кийин гана коё берилген Рузахунов казак күч кызматкерлеринин кыйноосуна кабылганын 10-февралда ачык айтып чыккан. Бети-башы көк-ала абалда 10-январда мекенине кайтарылган музыкант дароо Бишкектеги ооруканага жаткырылган.
Ал Алматыга иштери менен декабрдын аяк ченинде барганын, 7-январда кайтып келатып кармалганын, күч кызматкерлери анын паспортун, акчасын, айдоочулук күбөлүгү менен банк картасын тартып алып, кайра бербей коюшканын, ур-токмокко кабылгандан кийинки абалы өтө эле оор болгонун, кабыргалары сынып, бир кабыргасы өпкөсүнө кирип кеткенин, мээси чайкалганын айткан.
Быйыл январда Казакстандын бир катар шаарларында өкмөткө каршы нааразылык акциялары өтүп, натыйжада миңдеген адамдар камакка алынган, 200дөн ашуун адам каза болгон. Курман болгондордун экөө кыргызстандык экени расмий айтылган. Кармалган он чакты кыргыз жараны көп өтпөй коё берилген. Дайынсыз болуп жаткан дагы бир кыргызстандык аёсуз сабалган абалда Бишкекке жеткирилген. Соңку маалымат боюнча, Январь окуяларына байланыштуу кармалган бир кыргыз жараны азыр Тараз шаарында кармалып турат.
