Азыр дүйнө экиге бөлүндү. Бир жагынан Орусия, экинчи жагынан НАТО. Биз ким менен экенибизди чечишибиз керек. Бул тууралуу Бишкекте “Ой Ордо” эксперттик демилгелер борбору уюштурган «Астана саммиттеринин жыйынтыгы. Кыргызстандын интеграциялык процесстердеги ролу» аталышындагы тегерек столдо Улуттук коопсуздук боюнча мамлекеттик комитеттин төрагасынын экс-орун басары Асылбек Кожобеков билдирди. Анын айтымында, көп векторлуу саясатты уланта берсек, анда адашып калабыз.
«30 жылдан бери биз өзүбүздө дээрлик эч нерсе жарата алган жокпуз, биз совет доорунун урандыларында жашап жатабыз, биз ошол күчтүү мамлекеттин калдыктарына карманып келе жатабыз, маселе улуттук идеянын жарала электигинде. Кыргызстандын Борбор Азиядагы ролу кандай деген суроого да жооп беришибиз керек. Биз иш жүзүндө иммундук система – калктын пассионардуулугу жакшы иштеген жападан жалгыз өлкөбүз. Биз башкаруунун капиталисттик формасын кабыл албайбыз – элибиз башкача, өтө жогорку деңгээлдеги биримдикти, жогорку пассионардыкты жана жамааттык коомдук аң-сезимди көрсөттү.
Бүгүнкү күндө Орусия геосаясий программаларга каршы чыгып, өзүнүн цивилизациялык компоненти үчүн күрөшүп жатат, бирок дагы эле өзүнүн идеологиясына каршы тура албайт. Аны тез арада иштеп чыгуу керек. Бүгүнкү күндө Британиянын Тышкы иштер министрлигинин жашыруун чалгын кызматы Рахмонду толук көзөмөлдөп, ал Борбор Азияда согушту тутантуучу болуп жатат. Бул Тажикстандын ички иштери эмес, бул чоң геосаясий пландардын ишке ашырылышы. Биз эмне кылышыбыз керек? Биринчиден биз Орусия же НАТО менен экенибизди чечип алуубуз керек. Экинчиден, улуттук идеябызды тез арада өнүктүрүшүбүз керек, анткени биздин өлкөдөн чоң миграция агымы болуп, бара-бара инсандыгыбыздан ажырап калышыбыз мүмкүн.
Азыр Тажикстан менен чек арада чоң көйгөйлөр бар, ошондуктан, бул маселелерди чечүүгө жардам берип, ортомчу боло турган таасирдүү уюмду табуу керек. Башка эч кандай вариант жок. ЖККУ бул миссияны өзүнө ала алат деп эсептеген КР Коргоо министринин билдирүүсүнө кошулам. Мындай кырдаалда дагы кимге таяна алабыз? Түркия жана «Туранга» кошулуу боюнча пикирлер айтылды, бирок бул өлкө НАТО блогунун мүчөсү экенин унутпашыбыз керек.Тарыхыбызга тереңден көз салсак, биз эч качан түрк болгон эмеспиз, алар менен эч кандай тиешебиз жок. Биздин элдин аң-сезими таптакыр башкача», – дейт Асылбек Кожобеков.
