Алихан Смаилов Казакстандын премьер-министри болуп шайланды. Мажилистин төрагасы Нурлан Нигматулин аны 89 депутаттын баары бир добуштан колдогонун билдирди.
Казакстандын президенти Токаев өкмөт башчылыкка Алихан Смаиловдун талапкерлигин сунуштаган. Бүгүн, 11-январда парламенттин жыйыны өтүп, ага Казакстан президенти Касым-Жомарт Токаев онлайн катышкан.
5-январда казак президенти премьер-министр Аскар Мамин баштаган Казакстандын өкмөтүн отставкага кетирген. Ал эми премьер-министрдин милдетин аткаруучу болуп Алихан Смаилов дайындалган.
Эске сала кетсек, 2-январда Казакстандын Алматы, Актау, Жаңаөзен шаарларынын тургундары суюлтулган газдын баасын арзандатуу талабы менен нааразычылык акциясына чыгышкан. Бул тынчтык митинг Казакстандын түштүк аймактарынын баарына жайылып, акыры башаламандыкка, тополоңго айланып кеткен.
