Өлкөдө өрт өчүрүү кызматтарына жаңы имараттар курулат. Бул тууралуу Өзгөчө кырдаалдар министрлигинен билдиришти.
Маалыматка ылайык, Бишкек, Ош, Чолпон-Ата шаарларында жана Сузак районунда жаңы имараттар курулат. Негизги максаты өрт өчүрүү кызматтарын күчтөндүрүү менен калктын коопсуздук деңгээлин жакшыртуу.
Белгилей кетсек, долбоор Эл аралык кызматташтык боюнча Корей агенттигинин (KOICA) жана БУУнун өнүгүү программасы менен биргеликте ишке ашканы турат.
Эскерте кетсек, эртең алгачкы капсула Бишкек шаарында салынып, иш-чарага Бишкек шаарынын мэри Айбек Жунушалиев, ӨКМнын орун басары Акылбек Мазарипов, ПРООНдун Кыргызстандагы туруктуу өкүлү Луиз Чемберлен, Түштүк Кореянын элчиси Ли Вон Жэ жана KOICA мекемесинин директору Ли Жонг Су катышат.