“Евразия” оюн-зоок паркы үстүбүздөгү жылдын 1-сентябрынан тарта толук кандуу иштей баштайт. Бул тууралуу “Евразия. Кыргызстан” коомдук фондунун директору Кымбат Урумкулова аталган парктын ачылыш аземинде билдирди.
Анын айтымында, жаңы парк болжол менен 10 гектар аянтты ээлейт. Келгендер үчүн 30га жакын аттракцион, спорттук аянтчалар, фудкорт жана соода түйүндөрү акысыз жеткиликтүү болот.
“Паркка кирүү расмий мобилдик тиркеме аркылуу QR-код менен ишке ашырылат. Ал үчүн атайын “Евразия паркы” тиркемесин жүктөп алып, келүү убактыңызды тандап, алдын ала каттоодон өтүшүңүз керек. Парктын иштөө убактысы — саат 10:00дөн кечки 22:00гө чейин. Төмөнкү үч бөлүк менен иштейт:
- 10:00дөн – 14:00гө чейин;
- 14:00дөн – 18:00гө чейин;
- 18:00дөн – 22:00гө чейин.
Өзүңүзгө ыңгайлуу убакытты белгилеп, белгиленген убакытта гана кирүүгө болот.
Мобилдик тиркемеде күн сайын жаңылыктар жарыяланып турат. Ал жактан паркта болуучу иш-чараларга келип турсаңыздар болот.
Ошондой эле тиркемеде атайын карта жайгаштырылган — анда кайсы аттракцион кайсы жерде экенин көрүп, оңой табууга болот. Өзгөчө баса белгилеп айта кетүүчү нерсе парк жыл бою иштейт. Кыш мезгилинде атайын муз тебүүчү аянтчалар уюштурулат”,-деди ал.
