Талас облусунун жашоочуларына жеңилдик кылуу максатында базар баасынан арзан көмүр алынып келип элге сатылууда. Демилге өкүлчүлук тарабынан көтөрүлүп, каржылык колдоо «Альянс Алтын» компаниясынын өнүктүрүү фонду тарабынан болгон. Бул тууралуу КРнын президентинин Талас облусундагы өкүлүнүн басма сөз катчысы Бакай Садыров билдирди.
«Бул жылы Талас облусунда көмурдүн баасы жылдагыга салыштырмалуу жогорулады. Анын башкы себеби коңшу Казакстан мамлекети өздөрүнөн чыккан көмүрдү экспорттоого тыюу салгандыгы. Андыктан базарда көмүрдүн тоннасын жеке жактарга сатууда наркы 7-8 миң сомго чейин болууда. Тургундарга жеңилдик кылуу максатында Кара-Кече көмүр кенинен көмүр алып келүү ишин уюштурдук. Облусубузга ар дайым жардамын берип келген «Альянс Алтын» фонду көмүр ташып келүү үчүн кайтарымдуу негизде пайызы жок 2 (эки) миллион сом каражат бөлүп берди. Келишимдин негизинде көмүр ташыган тарап Талас шаарында 5200 сомдон жана райондордун борборлорунда 5300, 5500 сомдон элге жеткиликтүү сатышат», – деди басма сөз катчы.
Эскерте кетсек, Жерүй кенин иштеткен «Альянс Алтын» компаниясы түзгөн «Альянс Алтын» өнүктүрүү фонду өткөн кыш айларында дагы жергиликтүү тургундарга көмүр таңкыстыгы жаралганда жардам берген.