Президент Садыр Жапаров Россиянын Ульяновск облусундагы жол кырсыгында мекендештердин каза болгондугуна байланыштуу кайрылуу жасап, 23-августту аза күтүү күнү катары белгиледи.
Президенттин басма сөз кызматынан кабарлашкандай, мамлекет башчынын кайрылуусу төмөндө берилет:
“Урматтуу кыргызстандыктар!
Россиянын Ульяновск облусунда болгон суук кабар баарыбызды кайгыга салып, жүрөгүбүз ооруп турат. Кырсыкты кайдан деп болбойт. Мекендештерибиз жол кырсыгына кабылганына жаныбыз кейип, баарыбыз аза кайгыга батып турабыз.
Өзгөчө кырсыкка кабылгандардын жакындары үчүн өтө оор болуп жатканын мен жан дүйнөм менен сезип турам.
Мындайда көңүл айтуу да оор. Ошондой болсо да кырсыкка кабылгандардын жакындарына терең кайгыруу менен көңүл айтып, баарыңыздардын кайгыңыздарды тең бөлүшүү менен Жараткандан мындан ары жакшылык тилеп, сабырдуу болууга чакырам.
Ыйык Кураныбызда “Аллахым сабырдууларды сүйөт” деп айтылат. Кайраттуу болуп, сабыр кылалы мекендештерим!
Кырсыкка кабылгандардын жакындарына, туугандарына тиешелүү жардам берүү жагы токтоосуз колго алынат. Бул менин жеке көзөмөлүмдө болот.
Урматтуу мекендештер, бул кырсыкты жалпы элибиздин кайгысы катары кабыл алуу менен 23-августту Кыргыз Республикасынын аймагында жалпы аза күтүү күнү деп жарыялайм”,-деп жазылат маалыматта.