Президент Садыр Жапаров Пакистан Ислам Республикасынын премьер-министри Шахбаз Шарифтин чакыруусу боюнча 3-4-декабрда Пакистанга мамлекеттик сапар менен барат. Бул тууралуу президенттин администрациясынын тышкы саясат бөлүмүнүн башчысы Сагынбек Абдумуталип билдирди.

“Сапардын алкагында президент Садыр Жапаров Пакистандын премьер-министри Шахбаз Шариф, президент Асиф Али Зардари, Улуттук ассамблеянын (Парламенттин төмөнкү палатасы) Спикери Сардар Аяз Садик жана Сенаттын (Парламенттин жогорку палатасы) төрагасы Юсуф Реза Гелани менен эки тараптуу сүйлөшүүлөрдү жүргүзөт. Тараптар өз ара кызыкчылык туудурган бардык негизги тармактардагы эки жактуу кызматташуунун актуалдуу маселелерин, ошондой эле Кыргызстан-Пакистан мамилелерин андан ары өнүктүрүү келечегин талкуулашат. Сапардын алкагында кыргыз-пакистан бизнес-форуму да өтөт”, – деп белгиледи Сагынбек Абдумуталип.

Маалымат үчүн: Кыргызстан менен Пакистандын ортосунда дипломатиялык мамилелер 1992-жылдын 10-майында түзүлгөн. Кыргызстандын президентинин Пакистан Ислам Республикасына акыркы расмий сапары 2005-жылы болгон. Кыргызстан менен Пакистан Бириккен Улуттар Уюму, Шанхай кызматташтык уюму, Ислам кызматташтык уюму жана Экономикалык кызматташтык уюму сыяктуу эл аралык аянтчалардын алкагында кызматташып келет.

Жаңы стадиондун аталышы «Азаттык Арена» эмес, «Бишкек Арена» болот. Бул тууралуу Президентинин Иш башкаруучусу Каныбек Туманбаев билдирди.
«Кудай буюрса, 2026-жылдын август айында өлкө тарыхындагы эң ири жана эң заманбап спорт объектилеринин бири болгон жаңы стадиондун курулушу толук бүтүп калат. Алгач стадиондун аталышы «Азаттык Арена» деп белгиленген. Бирок, президент Садыр Жапаров калктын пикирин эске алып, коомдук талкууларды өткөрүп, элдин басымдуу бөлүгүнүн каалоосуна ылайык стадиондун жаңы аталышы расмий түрдө «Бишкек Арена» болуп өзгөртүлдү», — деп билдирди Туманбаев.

Бишкек мэри Айбек Жунушалиев түзүмдүк бөлүмдөрдүн бардык өкүлдөрүнө жетекчилерине жаңы жылдык белектер үчүн акча чогултууга тыюу салууну тапшырды. Бул тууралуу борбор калаанын басма сөз кызматы билдирди.

«Кээде биз жетекчинин биздин орун басарыбызга же мэриянын кеңсесине баштыкка акча чогултуп жатканын угабыз. Сураныч, бардык кызматкерлерге кабарлаңыз: эгер кимдир бирөө жаңы жылдык белек берүү үчүн бир тыйын чогултса, ал жетекчи ошол эле күнү жумуштан алынышы керек. Мен мындай баштык менен жүргөн жетекчилерди көргүм келбейт», — деп эскертти мэр.

Мындан тышкары аларга корпоративдик иш-чараларды өткөрүүгө тыюу салынганын эскертти. «Эгер кимдир бирөө кече өткөргүсү келсе жана анын акчасы көп болсо, анда ал башка өлкөлөргө барып, ал жерде өткөрүшү керек», — деди Айбек Жунушалиев.

 Бишкекте тазалоо иштерин жүргүзүп жаткан “Тазалык” муниципалдык ишканасынын кызматкерин унаа сүзүп каза болду. Бул тууралуу Бишкек шаардык Милициянын кайгуул кызматы башкармалыгынан билдиришти.

Ведомствонун маалыматына караганда, жол кырсыгы 26-ноябрда саат 07:05те Боталиев жана Кызыл-Кыя көчөлөрүнүн кесилишинде болгон. Унаа “Тазалыктын” кызматкери өзүнүн аймагын тазалоо иштерин жүргүзүп жатканда сүзгөн.

“Тилекке каршы жаракат алган жаран 27-ноябрда саат 06:40та Улуттук госпиталда эсине келбей каза болду”, – деп билдиришти милициядан.

Кызматкерлер жол кырсыгына шектүү айдоочуну табышып, ал 1989-жылы туулган Т.А. болуп чыкты. Учурда айдоочу убактылуу кармоо жайына киргизилип, иликтөө иштери жүрүп жатат.

Тышкы иштер министрлиги дүйнө жүзү боюнча чет өлкөлөрдө жайгашкан шайлоо тилкелеринде добуш берүү дээрлик аяктады деп билдирди.

Министрликтин маалыматы боюнча, 1-декабрда саат 12:00гө карата шайлоого 25 458 кыргызстандык катышкан.

Добуш берүү процессин аяктаган акыркы шайлоо участогу бүгүн, Бишкек убактысы боюнча саат 10:00дө АКШнын Сан-Франциско шаарында жайгашкан.

Улуттук илимдер академиясынын Сейсмология институтунун маалыматы боюнча, Кыргызстан жер титирөөнүн күчү болжол менен 3,0 баллга жеткен.

Маалыматка ылайык, жер титирөө 30-ноябрда саат 3:32де катталган.

Жер титирөөнүн очогу Кыргызстан аймагында (Тахталы кырка тоосу), Бор-Дөбө айылынан түштүк-батышка 8 чакырым, Кетмен-Төбө айылынан түштүккө 10 чакырым жана Токтогул районунун борборунан түштүк-чыгышка 30 чакырым алыстыкта ​​жайгашкан.

Бор-Дөбөдөгү жер титирөө Рихтер шкаласы боюнча болжол менен 2,5 баллга жеткен.

Бишкектеги «Ынтымак Ордодо»  Кыргызстандын президенти Садыр Жапаров менен өлкөгө мамлекеттик сапар менен келген Россия Федерациясынын президенти Владимир Путиндин расмий тосуп алуу аземи өттү.

Орусиянын лидеринин кортежин атчандардан түзүлгөн «Кырк чоро» аскерлер коштоп жүрдү. Резиденциянын алдындагы аянтта эки өлкөнүн мамлекеттик желектери көтөрүлүп, ардактуу кароол тизилип, кызыл килем төшөлгөн.

Кароол ротасынын командиринин рапортунан кийин, Кыргызстандын жана Орусиянын мамлекеттик гимндери жаңырды. Жетекчилер аскер кызматкерлеринин курамын карап чыгышты. Бул учурда Владимир Путин кароолго кыргыз тилинде кайрылып, аларды «Салам, аскер!» деген сөздөр менен тосуп алды.

Андан кийин президенттер расмий делегациялардын мүчөлөрүн тааныштырышты. Ардактуу кароол алардын жанынан өттү. Протоколдук бөлүктөн кийин Жапаров менен Путин эки тараптуу сүйлөшүүлөрдү баштоо үчүн резиденцияга киришти.

Сапардын программасына ылайык, тараптар кыргыз-орус кызматташтыгынын негизги маселелерин, интеграциялык бирикмелердин ичиндеги өз ара аракеттенүүнү жана аймактык актуалдуу маселелерди талкуулашат.

Ош облустук милициясынан билдиришкендей, Ноокат райондук ички иштер бөлүмүнө 2010-жылы туулган А.У. аттуу өспүрүм аттан жыгылып каза болгондугу, тез жардам унаасы менен Ноокат аймактык ооруканасына жеткирилгендиги тууралуу кабар берилген.

Аталган факт каттоого алынып, тергөөгө чейинки текшерүү иштери башталган.

Маркумдун жакындары соттук экспертизадан жана арыз жазуудан баш тартышкан.

Улуттук коопсуздук боюнча мамлекеттик комитет (УКМК) Ысык-Ата санаторийиндеги каражаттарды уурдоого байланыштуу тынымсыз коррупциялык схеманы ачыктады. Бул тууралуу агенттиктин басма сөз борбору билдирди.

Маалыматка ылайык, санаторий кызматкерлери кардарлардын төлөм тартиби тууралуу маалыматы жоктугунан пайдаланып, акча каражаттарын накталай алышкан. Ошол эле учурда, төлөм терминалдары аркылуу жөнгө салынган төлөмдөр жүргүзүлгөн эмес жана бейтаптар жөнүндө маалыматтар эсепке алуу журналдарына киргизилген эмес.

Бул факты боюнча кылмыш иши козголуп, анын алкагында «Ысык-Ата» санаторийинин кызматкерлери С.Э.С., Э.А.А., А.Г.О. жана А.у.О. күнөөсүн мойнуна алышты. Алар мамлекетке келтирилген зыяндын ордун толтурууга милдеттеништи.

Кемин районундагы Долпран алтын кенинин Т.Д. аттуу башкы директору кармалды. Бул тууралуу УКМК билдирди.

Маалыматка караганда, “Кемин Ресурс Групп” ЖЧКсынын ишмердүүлүгүн жүргүзүүдө Кытайдын аталган жараны көптөгөн мыйзамдарды бузганы аныкталган. Кенде экологиялык талаптар кандай аткарылып жатканын текшерүү үчүн буга чейин комиссия түзүлгөн.

“Натыйжада Долпран кенинде 14 398,6 чарчы метрлик жердин бети талкаланганы, лицензиялык келишимдин шарттары аткарылбастан коопсуздук эрежелери бузулганы аныкталды. Экологиялык экспертизанын корутундусуна ылайык, Долпран кенинин ишмердүүлүгү ири өлчөмдө зыян келтирген”, — деп айтылат маалыматта.

Тергөө жана ыкчам иш-чаралардын жыйынтыгы боюнча 20-ноябрда компаниянын Т.Д. аттуу башкы директору кармалып, Бишкек шаарынын Октябрь сотунун чечими менен УКМКнын тергөө абагына киргизилди.

Эске салсак, буга чейин Камчыбек Ташиев Кеминге барганда жергиликтүү эл андан алтын казган ишкананын ишин токтотуп берүүнү суранган. Тургундар аймак сейсмикалык жактан активдүү экенин, фабрика, калдык сактоочу жай куруу кооптуулук жаратарын айтып даттанышкан.